U Montri Rangbah ka Meghalaya, u Conrad Okay Sangma ynne da wai u yaka C&RD Block wa thymme ka jylla, ka Purakhasia C&RD Block ha Chongnapara, South West Garo Hills District deiwa emlang u MLA ka thaaiñ u Winnerson D Sangma, u Co-Chairman ka State Planning Board, u Ian Botham Okay. Sangma, ki bor District wa kiwi kiwa boon wa chah khut sñiawbha.
Chwa wow wai ya kani ka Block, ki bru ka thaaiñ Purakhasia em ki hapoh ka Dalu C&RD Block ka West Garo Hills, wei da hap ki wow maad boon i eh heiwa da hap ki wow lai cha Headquarter du neibynta ki kaam wa khian.
U Montri Rangbah hawa e yei klam da ong u wa hanla ka Meghalaya man ko ka jylla wa khian, da em ko palat 6000 tylli chnong wa kiwa boon tylli ki dong iwa da pynman iwa eh wow pynpoi ya waroh ki kaam pynroi cha waroh ki bynta ka jylla, kamtæ da emkaam wow chna ya boon tylli ki C&RD Block, ki Sub-Divisions wa ki Administrative Unit yow pynjan ya kiwa chong chnong. Kamtæ ka sorkar da rai ko wow pynmih chooh chooh chiboon tylli ki Block ha kiwa boon ki bynta ka jylla.
U Montri Rangbah leh da e kti u ya ka hukum sorkar wow pynkrehkaam noh ya ka Purakhasia Block cha ki bor District ka South West Garo Hills wa mihkhmat da ka A.V.D. Shira, ADC, wei da puræ ya ka da ka Joint Secretary, C&RD, ka S.R. Marak.
Hadien ini da saam leh ya ki FOCUS Plus Card cha kiwa yoh myntoi, da saam leh ya ki khon sñiang wa ki khon syiar hapoh ka PROGRESS cha ki SHGs wa ki chyieñ (Hybrid Seeds) cha ki warep hapoh ka MeghaLAMP wa kyrchaan da ka IFAD.
